வேண்டியதை நிறைவேற்றும் விராலி மஞ்சள் – வியப்பு தரும் விராலி மஞ்சள் – தம்பதி ஒற்றுமைக்கு எளிய பரிகாரம்
எந்த குடும்பமாக இருந்தாலும், தம்பதிகளின் ஒற்றுமையே அந்த குடும்பத்தை வழிநடத்தும் தூணாகும். தம்பதிக்குள் ஒற்றுமை குலைந்தால், உறவுகளில் விரிசல் ஏற்பட்டு, குடும்பமே சிதறி போகும் வாய்ப்பு உண்டு. இதுபோன்ற குறைகளை நிவர்த்தி செய்ய விராலி மஞ்சள் பரிகாரம் உதவுகிறது. இந்த பரிகாரத்தை எப்படி செய்ய வேண்டும்? விராலி மஞ்சளின் ஆன்மீக முக்கியத்துவம் என்ன? என்பதை இங்கே பார்ப்போம்.
விராலி மஞ்சளின் சிறப்பு
மஞ்சளில் பல வகைகள் இருந்தாலும், பரிகாரத்திற்கு உகந்தது விராலி மஞ்சள்தான். மருத்துவ குணம் நிறைந்த இந்த மஞ்சள் ஆண்டிபயாடிக்காக செயல்படுகிறது. தொற்றுகளை தடுக்கும் தன்மையுடையது. மருத்துவத்தில் மஞ்சளுக்கு உள்ள முக்கியத்துவம் போலவே, ஆன்மீகத்திலும் இது முக்கியமானதாக கருதப்படுகிறது. காரணம், மஞ்சள் மகாலட்சுமியின் அம்சமாகக் கொள்ளப்படுகிறது.
திருமண தடை நீக்கும் விராலி மஞ்சள்
எந்த காரியத்திலும் தடங்கல் ஏற்பட்டாலோ, திருமண யோகம் கைகூடவில்லையோ, அவற்றை நீக்கும் சக்தி விராலி மஞ்சளுக்கு உண்டு. இதையே கொம்பு மஞ்சள் என்றும் சொல்வார்கள்.
திருமணத்தடை உள்ளவர்கள் தங்கள் வயதிற்கு இணையான எண்ணிக்கையில் விராலி மஞ்சளை எடுத்து, சுத்தமான மஞ்சள் நூலில் கோர்த்து, ஒவ்வொரு புதன்கிழமையும் விநாயகருக்கு சாற்றி வழிபட வேண்டும். இதனால் திருமண தடை நீங்கும்.
தீராத நோய்களை நீக்கும் மஞ்சள்
தினமும் காலை குளித்த பின், பூஜையறையில் அம்பாள் படத்திற்கு முன் ஒரு விராலி மஞ்சளை வைத்து தீபம் ஏற்றி, 48 நாட்கள் பூஜை செய்ய வேண்டும். பிறகு, அந்த 48 மஞ்சள்களையும் மாலையாக கோர்த்து, கோயிலில் அம்பாளுக்கு சாற்ற வேண்டும். இதனால் திருமண தடை மட்டுமல்லாமல், தீராத நோய்களும் நீங்கும் என்று நம்பப்படுகிறது.
மேலும், 108 விராலி மஞ்சள்களை மஞ்சள் நூலில் கோர்த்து, வெள்ளிக்கிழமை அம்பாளுக்கு சாற்றி, தீபமேற்றி வழிபட்டால், நோய்கள் நீங்கி ஆரோக்கியம் கிடைக்கும் என கூறப்படுகிறது.
48 விராலி மஞ்சள்களின் பரிகாரம்
48 விராலி மஞ்சள்களின் மேல் குங்குமம் வைத்து, ஒரு தட்டில் மகாலட்சுமி பாதங்களில் வைக்க வேண்டும். தினமும் காலை குளித்து முடித்ததும், தீபம் ஏற்றி, 2 ஏலக்காயை நைவேத்தியமாக வைத்து, அந்த தட்டில் உள்ள மஞ்சள்களை ஒவ்வொன்றாக எடுத்து அர்ச்சனை செய்து வர வேண்டும்.
48 நாட்கள் பூஜை முடிந்ததும், அந்த மஞ்சள்களை மாலையாக கட்டி, கோயிலில் மகாலட்சுமிக்கு சாற்ற வேண்டும். இதனால் பிரார்த்தனைகள் நிறைவேறும்.
தம்பதியின் ஒற்றுமைக்கான பரிகாரம்
தம்பதிக்குள் அடிக்கடி சண்டைகள் ஏற்படின், செவ்வாய்க்கிழமையன்று கொம்புள்ள 2 விராலி மஞ்சளை எடுத்து, கணவன்–மனைவி உடைகளிலிருந்து சிறு துணிகளை வெட்டி எடுக்க வேண்டும்.
ஒரு விராலி மஞ்சளில் கணவனின் துணியையும், இன்னொரு மஞ்சளில் மனைவியின் துணியையும் சுற்றி, இரண்டையும் இணைத்து பூஜையறையில் வைத்து தீபம் ஏற்றி பிரார்த்திக்க வேண்டும்.
அடுத்த நாள் அந்த மஞ்சளை, கோயிலில் உள்ள புற்றில் போட்டு, புற்றை சுற்றி மஞ்சள்–குங்குமம் தூவி, வேண்டுதல் செய்ய வேண்டும். பிறகு அந்த இடத்தில் தூவிய மஞ்சளிலிருந்து ஒரு கைப்பிடி எடுத்து வந்து, வீட்டுப் பூஜையறையில் வைக்க வேண்டும்.
மறுநாள் காலை தம்பதிகள் இருவரும், அந்த மஞ்சளை தண்ணீரில் கலந்து குளிக்க வேண்டும். இதை 9 வாரங்கள் செய்தால், தம்பதிகளுக்குள் உள்ள சண்டைகள், மனஸ்தாபங்கள் அனைத்தும் நீங்கி ஒற்றுமை உருவாகும்.
வேண்டியதை நிறைவேற்றும், வியப்பு தரும் விராலி மஞ்சள் | தம்பதி ஒற்றுமைக்கு எளிய பரிகாரம்
